Ofscheidsrede bie’t ofscheid van oonzen Burgerva Michael Sijbom van de gemeante Loster!

Oh Michael, Oh Michael,

en dan bedoel ik niet die aartsengel.

Nee, dee Michael den 6 joar ledden in Losser as de Messias in wödden haalt,

dee as de reddende engel oawer oons neer was daald

Den Michael, den as ne wervelwind,

binnen no time bekend was bie allen, van oaldere tot kind.

Den oawera was, nog net nig tegeliek,

van hoog tot leag, van arm tot riek

Van samenzijn in lief en leed,

van opbeurend woord en vroagen hoe’t geet.

Van steun en troost woaras het mos,

van wandelen in veld en bos.

De Losserse ambtsketen werd weer zichtbaar, schitterde zilvergries van kleur,

en wödden in de eerste 2 moand meer gebroekt dan in 40 joar doarveur!

Bie elke club, vereniging of leu,

niemand dee ooit tevergeefs nen beroep op hem deu.

Nen opening, ontvangst of vriendelijk woord

heer Sijbom hef het allemoal kloard.

Elk kerkdorp was zien parel, ieder kwam an bod,

allemoal zaggen ze eer burgervader, gineen kwam wat tekort.

Michael stun veuran, was present as der wat gebeurden,

De Lutt hef de ofgelopen 6 joar nog nooit zo vaak merkt dat ze toch echt bie Losser heuren!

Menigeen dacht, dat döt’ e alleen in’ t begin, voort zal’ e echt wa goan wearken,

nee heur, Michael wus nig van ophoalen, heel Losser zol dat mearken.

En zölfs de grootste criticasters, want vrienden hej nooit alleen,

meusen bekennen, Sijbom was de beste en meest zichtbare Losser promotor dee ze ooit hadden zeen.

He vleug de hele gemeente deur, was oaweral mer emmn,

en tussendeur aait mer weer op zien mobiel kieken of doar nog wat was te belemmn.

De wearld blif deurdreaien en nen dag hef mer 24 uur, da’s wis,

mer der gebeurd in Losser nig völ as Michael der nig bie is!

Ok in ’t gemeentehoes kwam eindelijks es leamen,

menigeen kon zich zo noar zien wearkkamer begeamen.

Um’ t hart te luchten of es efkes te klasjeneren,

gewoon es van gedachten wisselen, dat kon heer Sijbom good waarderen.

Ie veulen oe bie hem op’t ketoor rap op’t gemak, vlot in de sas,

Dat kwam umdat’ t op Sijboms ketoor ok nig altied strak en geordend was…

De onneembare veste, wödden ne vriendlijk hoes,

vriend en vijand was der welkom en veulen zich der thoes.

Der in en der oet weaien, dat was ineens nig meer raar,

mer wat wo’ j ok bie nen burgermeester met meer energie dan 40 ambtenaren bie mekaar!

Promotie van oonze mooie gemeente, ok in het landelijk neijs,

menig journalist oet’t Westen, woagen noar hier de reis.

En leup met Sijbom langs de Deenkel of flaneren deur’t Lutterzand,

VVV Losser-De Lutt har de beste PR man van’ t hele land.

Nen Tubantia zonder heer Sijbom, was nooit onwies lang lenn’n

want as Michael der 3 dagen nig in har stoan, dach Losser: der zol toch nig wat wenn’ n?

RTVOost wus Sijbom ok altied wa te vinden

en Michael dacht, da’s mooi, kan ik mooi weer de strijd aan binden.

En  mien PR machien veur Losser weer loaten lopen,

bie elk wissewasje kwam Sijbom der veur of in beeld, doar was gin zendtied teggen te kopen.

Een menig over iets, politiek of cultureel,

2 woorden mening, mer nooit een woord teveel,

Want dan kwam Losser weer oawer de lippen

en dreaien oonze PR machine weer op volle toeren veur dat de media tied had dit der oet te knippen!

Van kiezers ophalen in de limo tot eieren bakken op Rosenmontag an de grens,

dat Sijbom holpen har wus weer ieder mens.

Hoogoet 1 ei umdreaien en rap nen vluchtig proost,

mer meer dan genog veur one moment of glory bie RTVOost!

Een groep leu is alleen doarum a onmeunig blie dat heer Sijbom geet noar’t noorden van’ t laand,

dat bint zien collega burgermeesters, noe stoat dee voort ok es in de kraant!

Want a’ j de oflgeopen 6 joar de kraanten good hebt leazen,

dan zo’ j hoast deanken, zol der in Twente mer ene burgermeester weazen?

No ja, vrouw Haverkamp wordt ok nog wa es neumd, is ja ok ne vrouwmenske

en Schelberg oet Hengel gung kottens bloomen potten bie paus Frenske.

Ik zee’ t volgende wek a veur mie, dan kiekt wie in de kraant en deankt…hef Sijbom noe nen board?

nee, das Theo Schouten oet Olnzel, den kump noe eindlijk ok is an’ t woord!

Ok de eendrachtige actie van de burgervaders teggen de maut an de Duutse grens,

was initieert deur burgerva Sijbom en veural zien grote wens.

As’ n nen dapperen Jeanne d’ Arc stun’ e doar met groten poal an de grens, gaf nig op en wödden’t nooit zat,

en de oaldere generatie dacht stiekum, ha’w doar in 1940 ok mer zo ene had!

Ik heb in dee 6 vergangene joaren,

oonze burgervader en zien team völ zeen kloaren.

Menig probleem wödden stewwig anpakt,

vaak wödden de knoop deur hakt.

Klean van stuk, mer groot van doad kwam ie Michael vaak teggen,

en hij was de Burgermeester dee Burgerforum stil hef kreggen.

Joa echt leu, ik dacht einde Burgerforum, dus ik maken doarvan notitie,

nee zeg Sijbom, ze bint der nog wa, mer dat neumd ze coalitie!

De gelederen in de Losserse politiek bint dus weer harmonieus in pais en vree,

de Losserse horeca doarintegen is minder te sprekken oawer avondklok 2.

De cafe’s wilt langer vedan, Sijbom zeg halt,

noa 2 uur gin drankgelach meer en dan wordt ok nig meer nachtelijk lalt.

Nee, alcohol en Sijbom, 2 dee mekaar in’ t openbaar nig vaak opzochten,

wat dat angeet he’w van waarnemend burgermeester Gebben voort meer te verwochten!

Ok gung Michael as nen medernen Don Quisjot,

de strijd an met de illegale wietkweek, heel wat bint der a vot.

Plantjes kweken is prima, mer dan a la eigen huis en tuin,

mer nig met dat verovende spul, ie hebt oe leaven zo in puin.

Nee, zeg heer Sijbom, weg met de drugs, doarmet is niemand gebaat,

zölf wordt ik het liefste high van eigengebakken appeltaart!

Dee gewone dingen, wat zult wie ze missen, hoe zal dat voort toch goan?

ik kan oe een ding zeggen, gin burgerva dee ooit weer zo tusske de burgers in zal stoan.

Den de leste 6 joaren 100% veur Losser gung,

den as nep prins opkwam, in’t Brueghelspel metdeu of as zwarte piet oet de oale toren an de touwen hung.

Den nig te stoppen was in zien eagen binnenpret,

as ze zeaden, kearl goa  toch hen fietsen, prima zea sijbom , mer dan nem ik wa toeristen met!

De toeristen zult oe missen, net as oons inwoners, wie valt voort in ne gat,

en dan he’w’ t oawer oe 5000 FB vrienden nog nig es had.

Op FB heulen ie oons altied good op de hoogte, leren ie oons het politieke vak,

steunen ie woar neudig of stellen ie oons op’t gemak.

Konnen wie oons ei kwiet, ieder goed of slecht verhaal,

met Michael as moderne biechtvader, mer dan digitaal.

Dat hoof voort allemoal nig meer,beste burgerva, schoef dee digitale vrienden mer an de kaant,

dan ku’ j oe richten op ene…vriendin mer dan an de haand!

Dat gunt wie oe allemoal en weanst wie oe too…

en Grönningen is ja zo kaal, doar vin ie ze zo!

Misschien lukt het oe doar, misschien wordt het balen,

mer ok in Grönningen bint sommige vrouwleu deur een ringetje te halen!

Aandacht veur oe zölf wat mot dat mangs ok lekker wenn,

en aandacht veur oe nöasten, messchien a weer nen helen zet ledden.

Wie sloat oons der wa deur heer Sijbom, ok zonder oonze Goede Herder,

dee net as Sint Martinus ziene mantel, alles met oons delen, wie mot, alleen, noe verder.

Een volk dat wandelt in het duister, zonder zien grote ster,

doar zu’w nog lang an deanken, ok a bi’ j nog zo ver.

Met nen zwoar gemood nemt wie voort ofscheid. Bedeankt oons: het is kloar

met in oonze gedachten, dee prachtige 6 joar.

Van warmte en nabijheid, wie sterft nog van verdriet…

hoewel wie dat dan wa veur 1 september mot doon, want doarnoa bi’ w de poli kwiet!

Mer oons burgerva a rapper, wie doot hem an de kaant,

en op’t peerd van ome Loeks sjokt Michael noar’ t Grunniger laand.

Doar woar niks is, alleen vlakte en weend,

en waor zommers en weenters zo onbarmhettig köaldte zeent.

Doar woar a’ j nig oppast zo weait in’ t koale wad,

doar woar a’ j stad Grönningen hebt en wieders menig gat.

Zo’ n overactieve Sijbom, wat he’ j doar tocht te beleven…

mer ze zult het doar ok goan metmaken: Sijbom löt Grönningen beven!

En nen Martinitoren hebt ze doar ok,al kan’e lang nig in de scha van d’ oonzen stoan,

het is veur oons nen geruststellene gedachen, dat Sint Martinus met oe met zal goan!

Völ meer Losser kuj’ t het nig kriegen en dat weanst wie oe dan ok too,

völ warmte en barmhartigheid en nig tevöl gedoo.

Da’ j Losser nig zult vergetten, dat zult wie met oe ok nig doon,

en woar het noe het mooiste is…tja,voor’t zeej’t ja gewoon!

En of ie’ t noe wa of nig met mekaar kunt vergelieken…

wie hopt da’ j oawer nen joar zult zeggen: Er gaat niets boven Groningen….mer Losser geet der met strieken!

Bedankt voor alles!

Jan Riesewijk 09-05-2017 Losser